पौराणिक मालिकांमध्ये अत्यंत लोकप्रिय ठरलेली आणि अभिनेता स्वप्निल जोशीच्या अभिनयाने सजलेली ‘श्रीकृष्ण’ ही मालिका येत्या २१ नोव्हेंबरपासून सोमवार ते शनिवार सायंकाळी ७.३० वा. शेमारू मराठीबाणा वाहिनीवरून प्रेक्षकांच्या भेटीस येत आहे. यानिमित्ताने श्रीकृष्णाच्या अगाध लीला आणि दैवी चमत्कृतींचं दर्शन आता आपल्या मराठी भाषेमधून प्रेक्षकांना होणार हे विशेष.
मराठी मनोरंजनसृष्टीतील आजचा आघाडीचा अभिनेता स्वप्नील जोशी याची ‘श्री कृष्ण’ ही गाजलेली लोकप्रिय मालिका मराठी रुपात शेमारू मराठीबाणा वाहिनीवरून प्रसारित होत आहे. याबद्दल बोलताना स्वप्निल जोशीने सांगितले की, “श्री कृष्ण ही गाजलेली मालिका शेमारू मराठीबाणा या वाहिनीवरून मराठमोळ्या रुपात प्रेक्षकांच्या भेटीस आलेली आहे या गोष्टीचा मला खूप आनंद आहे. 1993 साली आलेल्या या हिंदी मालिकेने मला वेगळी ओळख मिळवून दिली होती. मी स्वतःला खूप भाग्यवान समजतो की या मालिकेत मला कुमार वयातील श्रीकृष्णाची भूमिका करण्याची संधी मिळाली. प्रेक्षकांनीही या मालिकेला आणि यातील माझ्या भूमिकेला त्यावेळी प्रचंड प्रेम दिले होते. हा कार्यक्रम आता एका मोठ्या कालावधीनंतर छोट्या पडद्यावर आला आहे आणि तोही आपल्या मराठी भाषेत या गोष्टीचा मला विशेष आनंद आहे. आजही प्रेक्षक या मालिकेवर तसेच प्रेम करतील याची मला खात्री आहे. प्रेक्षकांचा हा प्रतिसाद आणि त्यांच्या प्रतिक्रिया जाणून घेण्यासाठी मी उत्सुक आहे. मराठी प्रेक्षकांसोबत असलेले माझे नाते या मालिकेमुळे अधिक घट्ट होईल असा विश्वास मला आहे.
काही कलाकृती या अजरामर आणि कालातीत असतात. श्रीकृष्ण ही मालिकाही अशीच अजरामर कलाकृती आहे. रामानंद सागर यांची निर्मिती आणि दिग्दर्शन असलेल्या श्रीकृष्ण या हिंदी मालिकेने नव्वदच्या दशकात प्रत्येक प्रेक्षकाच्या मनात घर केले होते. मराठीतला आजचा आघाडीचा अभिनेता स्वप्निल जोशीने यात किशोरवयीन श्रीकृष्णाची भूमिका साकारली होती जी अत्यंत लोकप्रिय झाली होती. महाराष्ट्रातही श्रीकृष्ण ही मालिका घरोघरी बघितली जात होती. ही बाब लक्षात घेऊनच ही मालिका मराठी भाषेमध्ये आणण्याचा निर्णय शेमारू मराठीबाणा वहिनीने घेतला.
या मालिकेद्वारे श्रीकृष्ण जन्माची कथा, यशोदा मातेच्या घरातील बाल कृष्णाच्या नटखट लीला, कालियामर्दन वध, क्रूर-अत्याचारी कंस मामाचा वध, कुरुक्षेत्रावरील अर्जुनाचं सारथ्य आणि गीतेचा उपदेश अशा विविध कृष्ण लीला आपल्या मराठी भाषेत शेमारू मराठीबाणा वाहिनीवरुन बघता येणार आहेत. शेमारू मराठीबाणा ही वाहिनी डीडी फ्री डिशसह सर्व डिटीएच सेवा आणि केबल नेटवर्क वर मोफत उपलब्ध आहे.
