लोकप्रिय अभिनेते चलपती राव यांचं हृदयविकाराच्या झटक्याने निधन; ‘किक’ चित्रपटात केलेली भूमिका

दाक्षिणात्य चित्रपटसृष्टीतील ज्येष्ठ अभिनेते चलपती राव यांचं रविवारी २५ डिसेंबर रोजी हृदयविकाराच्या तीव्र झटक्याने निधन झालं आहे. त्यांच्या अचानक जाण्याने संपूर्ण चित्रपटसृष्टीवर शोककळा पसरली आहे.

मुंबई-चित्रपटसृष्टीला जणू कुणाची नज़र लागली आहे. काही दिवसांपासून चित्रपटसृष्टीतून दुःखद बातम्या समोर येत आहेत. चित्रपटसृष्टीशी संबंधित आणखी एक वाईट बातमी समोर आली आहे. काल २४ डिसेंबर रोजी ज्येष्ठ अभिनेत्री रजिता यांचं निधन झालं होतं. त्यानंतर अभिनेत्री तुनिशा शर्मा हिने सेटवर फाशी लावून घेत आत्महत्या केली होती. आज टॉलिवूडचे ज्येष्ठ अभिनेते चलपती राव यांचं रविवारी २५ डिसेंबर रोजी सकाळी निधन झाले. ते ७८ वर्षांचे होते. चलपती यांना त्यांच्या राहत्या घरी हृदयविकाराचा तीव्र झटका आला. त्यानंतर त्यांचा जागीच मृत्यू झाला. या घटनेने त्यांच्या कुटुंबियांना मोठा धक्का बसला आहे. सोबतच चित्रपटसृष्टीवर शोककळा पसरली आहे.

डॉक्टरांनी दिलेल्या माहितीनुसार, चलपती राव यांना अनेक दिवसांपासून त्रास होत होता. त्यांची प्रकृती ढासळलेली होती. त्याच्या अशा अचानक जाण्याने त्यांची पत्नी आणि दोन्ही मुलांची अवस्था वाईट झाली आहे. चलपती यांनी सध्या काम करणं थांबवलं होतं. मात्र आपल्या अभिनयाच्या जोरावर ते अजूनही चाहत्यांच्या मनावर राज्य करत होते.

चलपती हे तेलुगू सिनेमात कॉमेडी पात्रांसाठी आणि खलनायक म्हणून ओळखले जातात. त्यांनी ६०० हून अधिक चित्रपटांमध्ये काम केलं आहे. आंध्र प्रदेशात जन्मलेल्या चलपती यांनी ‘साक्षी’, ‘ड्रायव्हर रामुडू’ आणि ‘वजराम’ सारखे हिट चित्रपट गाजवले आहेत. एवढंच नाही तर ते बॉलिवूड अभिनेता सलमान खानच्या ‘किक’ या चित्रपटाचाही एक भाग होते. त्यांच्या मृत्यूवर अनेक टॉलीवूड अभिनेत्यांनी शोक व्यक्त केला आहे.