समृद्धी महामार्गावर चहा विकण्यासाठी गेलेल्या एका चहावाल्याला मागून येणाऱ्या भरघाव टँकरने उडवले. यात चहावाल्याने आपला जीव गमावला.
मिळालेल्या माहिती नुसार मृत्युमुखी पडलेले माधव बालाजी वानखेडे (वय ४५ वर्ष रा. ईरळा ता. मालेगाव जि.वाशिम) हे इंटरचेंज जवळ चहा विकत होते. तिथे चहा पिण्यासाठी टँकरचालक थांबला होता. त्यावेळी मागून येणाऱ्या भरधाव कंटेनरने जोरदार धडक दिली व हा अपघात घडला, ज्यात चहा विक्रीसाठी उभे असलेले वानखेडे यांचा मृत्यू झाला, टँकर पलटी झाल्याने व कंटेनरचा समोरील भाग पूर्णपने चुरा झाल्याने दोन जण गंभीर जखमी झाले आहेत.
समृद्धी महामार्गावर सध्या खानपाणाची कोणतीही व्यवस्था नसल्याने चालकांची मोठी गैरसोय होत आहे. त्यातच लांब पल्ल्याचा प्रवास करणारे चालक थकवा घालविण्यासाठी चहाचा सहारा घेत असतात. हीच बाब हेरून अनेकजण थर्मासमध्ये चहा भरून या महामार्गावर विकतात. मात्र हेच आता अपघाताचे कारण ठरत आहे. या आधीही एका फळ विक्रेत्यामुळे अपघात झाल्याची माहिती आहे.
महामार्ग प्राधिकरणाकडून अधिकृत माहिती नाही
समृद्धी महामार्गावर अनेक मोठे अपघात होत असताना या अपघातांची अधिकृत माहिती महामार्ग प्राधिकरणाकडून माध्यमांना दिली जात नाही. बहुतेक वेळा झालेल्या अपघाताची माहिती लपवण्याचाच प्राधिकरणाच्या अधिकाऱ्यांचा हेतू असल्याचे दिसून येत आहे.
ज्याठिकाणी आजचा अपघात झाला तिथून टोल नाका व इंटरचेंज जवळच आहे. इथे समृद्धी महामार्गावरील कर्मचारी नेहमी असतात मात्र चहा विक्रीची ही बाब त्यांच्या निदर्शनास कशी आली नाही हा प्रश्न आता उपस्थित केला जात आहे.
