दिंडीत चालणाऱ्या वारकऱ्यांना कारने चिरडलं; ७ जणांचा मृत्यू, ८ गंभीर

सांगोल्यातील या दुर्घटनेचे वृत्त कळताच मुख्यमंत्री एकनाथ शिंदे यांनी तातडीने जिल्हा प्रशासनाशी संपर्क साधला. तसंच या घटनेतील जखमी वारकऱ्यांना ताबडतोब योग्य ते उपचार देण्यात यावेत, असे निर्देश दिले. हा अपघात कसा झाला याविषयी तातडीने चौकशी करण्याच्या सूचनाही यावेळी त्यांनी दिल्या आहेत.

कोल्हापुरातील वारकऱ्यांची दिंडी आज सायंकाळी ७ वाजता सांगोला तालुक्यातील जुनोनी येथील बायपास रस्त्याजवळ आली असता मिरजेकडून भरधाव वेगाने येणारी एमएच १२ डीई ७९३८ ही टाटा नेक्सॉन कार दिंडीत घुसली आणि वारकऱ्यांना चिरडत पुढे जाऊन थांबली. विठुरायाचे नामस्मरण करत निघालेल्या वारकऱ्यांना पाठीमागून येणाऱ्या कारने चिरडले.

कोल्हापूर जिल्ह्यातील पन्हाळ्याच्या पायथ्याशी असणाऱ्या जठारवाडी गावातील या दिंडीमध्ये एकूण ३२ वारकरी होते. या अपघातात पाच महिला, दोन पुरुष आणि एका लहान मुलाचा मृत्यू झाल्याची प्राथमिक माहिती मिळत आहे. अपघातग्रस्त कार सांगोला तालुक्यातील सोनंद गावातील असल्याचे समाजत असून यातील दोघांना पोलिसांनी ताब्यात घेतले आहे.

दरम्यान, या अपघातात जखमी झालेल्या सहा वारकऱ्यांवर सांगोला येथे उपचार सुरू असून मृतांच्या शवविच्छेदनास सुरुवात झाली आहे. सांगोला पोलीस ठाण्याचे पोलीस निरीक्षक अनंत कुलकर्णी यांनी माहिती मिळताच तातडीने घटनास्थळी येऊन जखमींना उपचारासाठी रुग्णालयात हलवले आहे. मृत आणि जखमींची ओळख पटवण्याचे काम सध्या सुरू आहे. मात्र वेगाने येणाऱ्या कार, ट्रक यामुळे दरवर्षी वारकऱ्यांना अपघातात आपला जीव गमवावा लागतो. त्यामुळे पायी येणाऱ्या दिंड्यांसाठी वेगळी यंत्रणा उभारण्याचं आव्हान आता प्रशासनासमोर निर्माण झालं आहे.