शिरुर मतदारसंघातील शिवसैनिकांनी गुरुवारी ‘मातोश्री’वर जाऊन उद्धव ठाकरे यांची भेट घेतली. तेव्हा उद्धव ठाकरे यांनी ‘मातोश्री’च्या आवारात या सर्व शिवसैनिकांशी संवाद साधला. यावेळी त्यांनी आढळराव पाटलांवर कडाडून हल्लाबोल केला. शिरुर मतदारसंघातील काही लोकं ‘ढळली’ पण खरी ‘अढळ’ लोकं माझ्यासोबत कायम आहेत, अशा शब्दात आढळरावांवर प्रहार केला.
मुंबई: शिरुर मतदारसंघातील काही लोकं ‘ढळली’ पण खरी ‘अढळ’ लोकं माझ्यासोबत कायम आहेत, असे सांगत शिवसेना पक्षप्रमुख उद्धव ठाकरे यांनी शिंदे गटातील नेते शिवाजीराव आढळराव पाटील (Shivajirao Adhalrao Patil) यांना टोला लगावला. नाव एक आणि करायचं दुसरंच, असा हा प्रकार झाला. शिरुर मतदारसंघात शिवनेरी किल्ला आहे. या किल्ल्याच्या नावाला बट्टा लागणे हा शिवसेनेचा (Shivsena) अपमान आहे. त्यामुळे यापुढे शिरुरच्या राजकारणात अशी गद्दार लोकं आढळता कामा नये, असे उद्धव ठाकरे यांनी शिवसैनिकांना सांगितले. शिरुर मतदारसंघातील शिवसैनिकांनी गुरुवारी मातोश्रीवर जाऊन उद्धव ठाकरे यांची भेट घेतली. तेव्हा उद्धव ठाकरे यांनी मातोश्रीच्या आवारात या सर्व शिवसैनिकांशी संवाद साधला.
यावेळी उद्धव ठाकरे यांनी माजी खासदार शिवाजीराव आढळराव पाटील यांच्यासह शिंदे गटावर निशाणा साधला. मी एक गोष्ट तुम्हाला पुन्हा पुन्हा सांगू इच्छितो की, देवाने ही आपल्याला दिलेली संधी आहे. आपल्यावर हिंदुत्त्व आणि लोकशाही टिकवण्याची आणि वाढवण्याची जबाबदारी आहे. मध्यंतरी हिंदुत्त्वाच्या खोटेगिरीचा जो कळस गाठला गेला, ते म्हणजे इतिहासातील तोतयाच्या बंडासारखा प्रकार होता, असे उद्धव ठाकरे यांनी म्हटले. आता उद्धव ठाकरे यांच्या टीकेला शिंदे गटाकडून कशाप्रकारे प्रत्युत्तर दिले जाणार, हे पाहावे लागेल.
शिंदे गटाच्या बंडानंतर शिवसेनेचे मुखपत्र असलेल्या ‘सामना’ वृत्तपत्रात आढळराव पाटील यांच्या हकालपट्टीचे वृत्त प्रसिद्ध झाले होते. परंतु, हा प्रकार नजरचुकीने घडल्याचे नंतर समोर आले होते. मात्र, या सगळ्यामुळे आढळराव पाटील हे कमालीचे दुखावले गेले होते. याच नाराजीतून अढळराव पाटील यांनी शिंदे गटात प्रवेश केला होता. मात्र, त्यानंतर आढळराव पाटील यांना शिवसैनिकांच्या रोषाचा सामना करावा लागला होता. संतप्त शिवसैनिकांनी आढळराव पाटील यांच्याविरोधात आक्रमक आंदोलन केले होते.
येत्या काही दिवसांमध्ये मुंबईतील बीकेसी मैदानावर शिंदे गटाचा दसरा मेळावा होणार आहे. यावेळी शिवाजीराव आढळराव पाटील यांना बोलायची संधी मिळाल्यास ते उद्धव ठाकरे यांच्या टीकेला प्रत्युततर देऊ शकतात. या दसरा मेळाव्यासाठी शिंदे गटाकडून जय्यत तयारी करण्यात आली आहे. शिंदे गटाला एमएमआरडी मैदानावरील आपला पहिला दसरा मेळावा यशस्वी करण्यासाठी १ लाखाची गर्दी जमवण्याची गरज आहे. औरंगाबादमधील शिंदे गटाचे आमदार आणि कृषीमंत्री अब्दुल सत्तार यांनी कार्यकर्त्यांना मुंबईत आणण्यासाठी ५ ऑक्टोबरला ३०० एसटी बसेस बुक केल्याची माहिती आहे.
